Yeniyetmə və Gənclərdən ibarət seçmə komandamız Türkəyinin İzmir şəhərində 37-ci Avropa çempionatından qızıl medalla dönüb. Mötəbər yarışa Azərbaycan Milli Karate Federasiyasının prezidenti Yaşar Bəşirov və milli komandaların baş məşqçisi Rəhman Hətəmovun rəhbərliyi ilə yollanan 14 idmançımızdan, Fəyyaz İldırımzadə yeniyetmələr arasında +70 kq çəki dərəcəsində Avropa çempionu olub.  

   1/8 finalda makedoniyalı, ardından isə serbiya və ingiltərəli rəqiblərini məğlub edən Fəyyaz İldırımzadə fransalı idmançı ilə final döyüşünü daha yüksək səviyyədə keçirərək 5-0 hesablı qələbə qazanıb. Perspektivli karateçilərimizdən Aynur Məmmədova, Rafiz Həsənov və Ayxan Mamayevin medal qazanmaq şansları olsa da, onlar son anda imkanı əldən veriblər.
 
   Bu nəticə ilə Azərbaycan 41 ölkə arasında qeyri-rəsmi komanda hesabında 14-cü yeri tutub. 2009-cu ildə Parisdə Yeniyetmə və Gənclərin 36-cı Avropa çempionatında 3 bürünc medala sahib olan karateçilərimiz, qeyri-rəsmi komanda hesabında 26-cı yeri tutublar. Qeyd edək ki, müxtəlif yaş qrupları üzrə seçmə komandalarımızın uğurları Gənclər və İdman nazirliyi, eləcə də Azərbaycan Beynəlxalq bankının birbaşa dəstəyinin nəticəsidir.  

   Yeniyetmə və Gənclərin 39-cu Avropa çempionatı 2012-ci ilin fevral ayında Bakıda keçiriləcək.